YGBC KONGLAM TAWI
Yangon Gospel Baptist Church (YGBC) cu July 7, kum 2012 ah fellowship in a rak dir i, nihin ni tiang Pathian rian a tuan cuahmah mi hna: Rev. Kyaw Myint, Rev. Dr Hre Ling, Rev. Sang Hlun, Dr. Henry Thang Bik Lyan le (Bible) siahngakchia cheukhat hna he kum (2) chung fellowship in a rak kal hnu ah, kum 2014 ah Yangon Gospel Baptist Church (YGBC) tiah min pek (thlen) a rak si. YGBC cu Gospel Baptist Church Hakha Association (GBCHA) he pehtlaihnak ngei in rian a tuan mi a si. Cun, YGBC cu kum zeimawzat, Yangon hmun dang tete ah inn hlan chom in caan rak hman lio caan hna zongah pastor te nih Pathian tihzahnak le lungsau thinfual tein an rak thithruai zungzal.
Hi bantukin caan hman arak si lio ah biakinn cawkho (ngei kho) dingin saduhthahnak kan rak ngei i Bawipa sinah kum (3) leng biakinn aa ngeih khawh ve nak hnga tiin thlacamnak rak ngeih lengmang a rak si. Bawipa a zaangfahnak in zumtu hna kan thlacamnak a ngaih i, tu kum (2020) thlathok ah, Bawipa nih ramchung ramleng um zumtu Khrih ah u le nau, hawikom dawt le riantuan hawi vialte hna le a Khrihfabu dangdang tete hna hmangin thlacam-pumhnak innkhan (apartment) te zong YGBC nih aa hun i cawk khawh ve i kan i lawmtuk hringhran, Bawipa Min thangthat in um ko seh!
Hi ti bantuk in, a lam kip in aa rak telmi an dih lak cungah kan i lawmtuk hringhran, kan biak mi liannganbik kan Pathian tu nih a let tam pi'n thluachuahnak pe cio hram ko hna seh. Bawipa lamhruainak in Rev. Sang Hlun cu ramdang (Korea) ah Bible Sianginn a kan pehpiak lio a si i, Rev. Kyaw Myint (senior pastor) le saya Ngun Nawl (assistant) thithruainak in Pathian biak ti nak le riantuan tinak in caan hman cuah mah in a um. Bawipa nih YGBC hi lam a hruai i thluachuah a pek hrimhrim ko ti hi kan hngalh. Sihmanhsehlaw, zumlotu hna si loin zumtu (pumpak, chungkhar, hawidawt, Khrihfabu) hna lila hmangin thluachuah pek kan si ti zong hi kan hngalh fawn.
Adonghnak ah, YGBC cu a lam kip in dirhkamh le thazaang pek a herh mi kan si caah Ram chung/leeng um zumtu hawidawt vialte hna nan thlacamnak paoh ah YGBC nan rak kan philh lo nak lai Khrih kan Bawipa Min in sawm kan in duh hna. Kan duh bikmi cu Pathian duhmi a si ve ding asi: cucu mivialte nih khamhnak co hna sehlaw, biatak hngal dih hna seh ti hi a si. Cun kan pawngkam i zumlotu hna sinah kan si khawh chung Pathian bia chimphuan/karhter le zumtu cia pawl Khrih hnuzultu an si khawh ding tiang hi kan i hmaithlaak bik mi asi ko. Kan Pathian daihnak, a vel le thluachuah cu careltu nan dih lak cungah tlung hram ko seh, Amen!