ZUMHNAK TLAIHTLEENG
(ARTICLES OF FAITH)
(1) Baibal
Cathiang hlim hi Genesis in Biathlam tiang uk (66), Biakam Hlun ah (39) le Biakam Thar (27) a si. A hmasa bik ah a tialmi (Origianl manuscript) cu a biafang zapi in siseh, a pumhlum in siseh, Thlarau Thianghlim i thawchuah hnawhmi a si, tiah kan zumh. Thlarau thianghlim i hruai le fialmi pawl nih tialmi biatak a si caah a palh kho lo, sual kho lo a si, tiah kan zumh.
(2) Pathian
Rikhiah ngei lo thlarau, zeizong vialte sersiamtu, lei le van uk dihtu Pathian nung le Pathian fel lawng a um tiah kan zumh. Pathian cu amahte in um, hmuh khawh lomi, chim fiang kho lo tiang i sunglawi, thianghlim, thangthatnak tling hmuhtlak le upat tlak a si tiah kan pom. Pathian mi pakhat (one essence) chungah mi pathum (3 persons) an um i, Pa, Fa le Thlarau Thianghlim, thumthlak Pathian, zeizong vialte a sersiam, an tuahti, an tuanti, thil tikhawhnak aa lomi, aa khatmi an si tiah, kan zumh. (Exodas 20: 2, 3; 1 Kor. 8: 6; Biat. 4: 11).
(3) Thlarau Thianghlim
Thlarau Thianghlim cu vanlei (Pathian) mi pakhat a si. Pa Pathian le Fapa Pathian he sinak aa khatmi, sersiamnak i tel dih Pathian i timhmi a tlin hlan lo vawleicung zum lotu sinah Satan duhtawk in cawnlcang kho lo ding in a kham. Sual kongah siseh, dinfelnak kongah le biaceihnak kong ah siseh theihtertu a si. Cun, thawngthabia biatak phuannak le theihternak a langhter. Hrinthantertu a si. Aa hmahthah, a thuamh, a hruai, a cawnpiak, a theihpi, a thianhlimter i zumtu pawl a bawmh.
Joh. 14: 16, 17; Mat. 28: 19; Heb. 9: 13; John 14: 26; Luk. 1: 35; Gen. 1: 1-3; John 16: 8-11; Lam. 5: 30, 32; John 3: 5-6; Efe. 1: 13; Mark 1: 33; Lam. 11: 16; Luk. 24: 49; Rom. 8: 14, 16, 27.
(4) Jesuh Khrih
Zungzal a nungmi Pathian fapa cu minung pa ci tel loin minung ah a cang. Thlarau Thianghlim in hrin, ngaknu thiang Mary hrinmi a si. Zeibantuk minung hmanh amah bantuk nu hrinmi an chuak bal lo i, an chuak fawn ti lai lo. Pathian sinak tling, minung sinak tling, amah (min pakhat) ah a um. Khamhnak caah, sual ngei lo thianghlimte in a nung i a Pa bia ngaihnak le misual aiawh in vailam cungah a thi. Sual ngaihthiamnak caah, a thisen zungzal caah voi khat a luang. Phum in a um i a nithumnak ah thihnak a tei i a sunglawimi taksa he a tho than. Van ah a kai than i a Pa orhlei kam ah um in a mah zumtu pawl caah thla a kan campiak. A chimcia bang in taksa le hmuh khawh in sunlawinak he a tum, a ra than lai. Siangpahrang sinak he a ra lai i, vawleicung a uk lai.
Isaiah 7: 14; Mat. 1: 18-25; Luk. 1: 25; John. 1: 14; 2 Kor. 5: 21; Fili. 2: 7; 1 Kor. 15: 3; Lam 1: 11; John 14: 1-3; Biat. 19: 16.
(5) Satan (The Devil or Satan)
Satan hi sinak taktak (reality) le mi sinak (personality) ngeimi a si tiah kan zumh. Amah cu Pathian nih vancungmi (angel) in a sersiammi a si nain, i porhlawtnak le hngalnak (pride) ruangah amah sersiamtu a doh i, ral ah a cang. Amah cu thurhnawmhnak phuntling i khat, muihnak thawnnak bawi a si i zungzal meitilipi ah thlak ding a si, tiah kan pom.
Isai. 14: 13-15; 2 Kor. 4: 4; Mat. 4: 1-11; Bia. 20: 10.
(6) Sersiamnak
Lei le Van, Ni le Thla, Arfi, Vancungmi, Minung nih hmuh khawhmi le hmuh khawh lomi (physical Universe) vialte hi Pathian nih a sersiam dihmi an si. Minung hi Pathian kut bak i sersiammi a si. Minung paohpaoh hi, mi vialte ci thlahtu nu le pa, Adam le Evi i cithlah an si. Baibal nih a chimmi vialte hi a dihlak in a hman dihmi a si, tiah kan zumh. Zei paoh hi amah te i a um ciami (evolutionary process) si loin Pathian nih a sersiam dihmi an si, tiah kan pom.
Gen. 1: 1; Col. 1: 16-17; 1 John. 1: 3
(7) Minung tlukchiatnak (The Fall of Man)
Minung hi Pathian i muisam keng sual ngei lo i sersiammi a si. Amah duh thimnak nih Adam cu sual ngei lo le dirhmun nuam in mi vialte cu amah chung ah misual kan si. Adam ruangah mi vialte a rawkral cikcekmi kan si. Minung cu tlukchiatnak ruangah Pathian he kan i then lawng si loin, um ti kho ti lo, nun dang ngei, sinak zong i sual, umtu khuasak zong i sual, a si caah hnonmi le mahte aa khamh kho ti lomi kan si, tiah kan pom.
Gen. 3: 1-6; Rom. 3: 10-19; 5: 12, 19
(8) Khamhnak (Salvation)
Misual khamhnak hi van lei thil, Pathian laksawng a si. Pathian a kan dawtnak ruangah, minung hna sinah a pekmi ngeihchun Fapa Jesuh Khrih i thisen in a si. Minung nih tuahmi a si lo. Khrih cu Pathian nih a dawtnak minung sinah a langhternak, a zaangfahnak thil pek hrimhrim a si. Amah cu sual ngei lo, thianghlim tlamtling, kan sualnak ruangah kan in dingmi vialte a kan inpiaktu misual aiawhtu a si. Amah cu Martar i thi a si lo. Sual ngei lo cu misual ah canter in misual caah aiawh in a thi. Jesuh Khrih nih a taksa bak in thingcungah kan sual a phorh a si ti kan zumh.
Jesuh Khrih thihnak cu kan thih venak, a phumnak cu phum i kan um venak, a thawh thannak cu amah thawngin kan thawh than venak a si tiah kan zumh. Amah cu zeiti lei zong in a tling bakmi, zaangfah kho le a tlamtlingmi khamhtu a si.
Khamhnak a um chun cu Bawipa Jesuh Khrih zumhnak lawng in a si. Ngaihchihnak cu thinlung i thlen i Pathian neih duhnak a si caah Thlarau thianghlim nih cun a kan hruai i khamh zumhnak (Saving Faith) ngei kho dingin a kan bawmh.
John 2: 9; Eff. 2: 8; Heb. 2: 14-17; Isa. 2: 4-7; 1 John 4: 10; 1 Kor. 5: 21; 1 Pet. 2: 24; 1John 4: 10; Mat. 1: 21; Lam. 4: 12.
(9) Thawhthannak le Tlangbawi Sinak
Khrih cu taksa bak in a thothan i van ah a kai ti kan zumh. Atu ahcun Pa Pathian i orhlei kam ah a thu i kan caah tlangbawi rian a tuan i a kan hal/nawlpiak tiah kan zumh.
Mat. 28: 6, 7; Luk. 24: 39; John 20: 27; 1 Kor. 15: 4; Mark. 16: 6; Lam. 1: 9-11; Biat. 3: 21; Heb. 8: 6, 12: 2, 7z; 25; 1 Tim. 2: 1; Heb. 2: 17; 5: 9, 10
(10) Zaangfahnak le Piantharnak (Hrinthannak)
Khamh kan si khawhnak dingah kan hrinthar hrimhrim a hau. Hrinthan timi cu Khrih Jesuh ah serthar a si. Dusahte i thil um a si lo i cop le cilh in a si. Hrinthannak ah cun sual le rawhralhnak chung i thimi, Pathian sinak cotu ah tuah i, um in, Pathian i pekmi zungzal nunnak cu ngeih a si. Cu nunnak thar cu kan hngalhnak pinlei Pathian thawnnak i tuahmi a si i, cucu Pathian biatak he pehtlai in thiang thlarau thil tikhawhnak a si. Hrinthan a sinak langhtertu cu lungthlen zumhnak le nunning thar, theitlai tha a lang tiah kan zumh. Mi hrinthar pawl cu Pathian kutchung i kilvenmi an si caah an khamhnak a tlau kho lo tiah kan zumh.
John 3:3; 2 Kor. 5: 17; 1John 5: 1; Lam. 1: 30-33; 2 Pet. 1: 4; Rom. 6: 23; Efe. 2: 1, 5; Col. 2: 13; John 10: 28-29;Col. 3: 3; Rom. 8: 29-39.
(11) Thiamconak le Thianhlimnak
Thiamco ti cu a dingfel ti phuanchuahnak a si. Thiamcoter ti cu zumtu pawl Jesuh i dinfelnak ruangah Pathian nih a dingfel a si tiah a phuanchuahmi (Rom. 3: 24; 4: 5; 5: 1, 9; Gal. 2: 16; Fili. 3: 9)
Thianhlimnak cu Pathian nih zumtu pawl amah caah a dangte i chiahmi tinak a si. Hi thianhlimnak hi phun thum in a um tiah kan pom.
(i) Jesuh Khrih i thianhlimnak thawngin, kan hrinthan cangkate i kan comi, Pathian hmai i kan thianhlimnak.
(ii) Mi hrinthan nun ah Pathian bia hmang in Thiangthlarau thianhlimternak.
(iii) Jesuh Khrih a rat than tikah a thianhlim tlamtlinnak an si tiah kan zumh (Heb. 10; 10-14; 3: 1; John. 17: 17; 2 Kor. 3: 18; 1 Kor. 1: 30; Efe. 5: 25-27; 1 Thess. 4: 3; 5: 23, 24; 1 John 2: 2; Jud. 24, 25; Biat. 22: 11).
(12) Khrihfabu (The Church)
Khrihfabu timi cu a dangte i auh chuahmi a si i, langhning pahnih a ngei tiah kan pom.
(i) Hmuh khawh lo Khrihfabu (The Universal Church) le
(ii) Hmuh khawh Khrihfabu (The Local Church) hi an si. Hmuh khawh lo Khrihfabu cu Pentecost ni le Rapture karlak i Jesuh Khrih zumtu mi hrinthar zapi an si. Mah cucu Baibal nih Khrih taksa tiah a ti. Hmuh khawh Khrihfabu cu mi hrinthar tipil a ing cangmi hmun khatte umti, Baibal biatak le thiangthlarau nih vawlei mi lak in a dangte in a auh chuahmi, Khrih nawl pek a zul timi, Pastor le Khrihfa upa nih hruainak ruangah Pathian sunparnak dingah pum khatte in umti i riantuanti pawl tiah kan pom.
Mat. 16: 18; 1 Kor. 12: 13; Efe. 1: 2, 23; 4: 15, 23; Col. 1: 18; 3: 11; Matt. 28: 19-20; Lam. 2: 41-46; Fili. 1: 1
(13) Khrihfabu laak le Jesuh voihnih ratthannak (The Rapture & The Revelation)
Kum 1000 uknak hlan, kum 7 harnak hlan ah Jesuh cu a Khrihfabu pawl hruai ding ah amah bak vawleicung phan in a ra than lai ti kan zumh. Mah caan hi amah kutchung ummi a si i, zeitik caan paoh ah a phan kho.
Cucaah Jesuh Khrih i aa hngilhmi (thimi) pawl an taksa in an tho hmasa lai i, a nungmi hrinthan pawl cu thlen dih in an um lai. Cuticun amah Jesuh he umti dingah van ah laak dih kan si lai tiah kan zumh.
1 Thess. 4: 13-18; 1 Kor. 15: 58; Fili. 3: 20, 21; Bia. 11: 1-5.
(14) Kum 7 Harsatnak (The Great Tribulation)
Jesuh Khrih nih a Khrihfabu a lak dih hnuah vawleicung ah harsatnak kum 7 a phan lai tiah kan pom. (Dan. 9: 27; 12: 7; Mat. 24: 29-31; Bia. 11: 1-5)
(15) Kum 1000 uknak (The Millennial Kingdom)
Kum 7 harnak a dih tikah Jesuh cu taksa hrimhrim in Mithianghlim pawl he a tum lai i vawleicung pumpi ah Siangpahrang vialte ih Siangpahrang ah kum 1000 chung a uk lai tiah kan pom. (Isai. 9: 1-7; Luk. 1: 30-33; Bia. 20: 1-4)
(16) Pathian damternak (Divine Healing)
Pathian cu khuaruahhar tuah khotu le damter tu tiah kan pom (Ex. 15: 26; 23: 25;Salm 105: 3; 107: 20; Mat. 8: 14-17).